Tiffany Blue牛奶醬好靚呀~藍色控必愛!

Jan 8 2016

果醬界近年真係多姿多彩，時不時就會彈出令人驚喜、垂涎三尺嘅新產品！今次，果醬界又有新秀彈起啦！呢位新秀嘅組合非常特別，係以海洋同牛奶為主題。關於海洋同牛奶，記者諗到嘅係：一個海藍色、一個純白色；一個鹹味、一個甜味，確實難以想像兩者混合之後嘅結晶品。但當記者見到完成品後，完全吃驚！Tiffany Blue色嘅牛奶醬真係好靚，自問縱橫Jam界多年嘅記者都係第一次見到咁引人入勝嘅顏色！

Ocean MilkJam 海洋牛奶醬＄58/100ml

雖然顏色迷人，但都禁不住想問句：「係未放咗好多色素㗎？」，愛以甜品實驗為樂嘅店主話海洋牛奶醬嘅藍色係用來自泰國，並含有天然藍色色素嘅蝶豆花調配出嚟，不含人造色素，而且所有果醬都不含防腐劑同全人手製造，叫大家放心食用！而Ocean MilkJam 食落甜中帶鹹，質感幼滑，果然將海洋（海鹽）同牛奶嘅組合發揮得淋滑盡致。

海洋牛奶醬除咗用嚟搽麵包之外，都可以有唔同嘅配搭，店主就試過配熱香餅、朱古力布朗尼蛋糕同鬆餅道。佢話加入咖啡同加水製成Smoothies得非常好味，記者就未試過，大家試完記住話返畀我哋知！

繼續閱讀：三款「賣斷市」果醬推介

仲未接受到藍色嘅海洋牛奶醬？唔緊要！講到明店主鍾意做「甜品實驗」，佢仲炮製咗三款曾「賣斷市」嘅果醬，望落都相當吸引！