點心卡路里逐件睇！飲茶一盅兩件 點食先唔肥？｜食是食非

撰文：ning 圖片：Wyman、新傳媒資料室（食物圖片只作參考）
營養顧問：尚營坊健康顧問高級營養師Cynthia Wong、食物安全中心

點心卡路里排行榜
15款逐件數！

1. 不算肥 可以放心食

蝦餃、鳳爪、燒賣算是點心卡路里比較低的類別，大可以比較放心食。不過也要留意，蝦仁脂肪不高，但蝦餃皮用了油來搓，宜適量食，更要注意4粒蝦餃就等於一碗飯！鳳爪的雞皮有油脂，加上豉汁濃醬，一隻已經唔少嘢。燒賣內也加了肥豬肉和豬油，少少肥。

2. 注意適量食

鮮蝦腸粉的蝦肉和米漿熱量不高，但建議豉油分開點，減少鹽份吸收。奶皇包是低卡包點，不過糖份較高。山竹牛肉本身脂肪多，內裡其實隱藏肥豬肉，肥！潮州粉果加了花生，熱量、脂肪再拉高！煎腐皮卷本身腐皮有大豆油，再釀餡煎炸，不宜多吃。

3. 少食為妙

叉燒包除了醬汁，也有混合肥膏的叉燒；鮮竹卷又係腐竹之餘，撈埋蠔油汁，高鹽又高脂；炸春卷、芋角、咸水角的外皮都有澱粉質，一炸吸盡油，內裡再加肥豬肉餡，極危險！

4. Danger！高危暴肥

珍珠雞的糯米，卡路里等同白飯，加上餡料以油炒香，熱量自然高！以為馬拉糕是齋兼是蒸點就健康？錯！製作過程加了大量豬油和糖，一件已經超危險，睇住食！

點心卡路里小迷思
營養師一一拆解！

1. 點心細細粒，只要淨食蒸點便無事？

根據營養師提供資料，基本上一件蒸包、四粒蒸餃，已經400 kcal，接近一個成年女性每餐所需的卡路里，男士加多條腸粉都已經夠數，所以點心望落細細件，其實食多幾粒就爆標！加上不少點心混入豬油、肥豬肉，無論蒸點、炸點，一樣危。

2. 飲茶可以消脂，不容易肥？

茶類並沒有去油的作用，消滯功效亦不高，所以無助減肥！不過可以在食點心過程中飲茶，變相飲多了水，增加飽肚感。情況和先飲湯、再食飯的效果類似。

3. 落豉油、喼汁、辣椒油，罪孽更深重？

豉油和喼汁熱量不算高，只須注意當中的鹽份。但辣椒油就忌用，一茶匙已有45 kcal，連點心食就更肥，建議改用只有6 kcal的辣椒醬或是辣椒絲加入豉油。