韓國人經營 必食亞朱媽 年糕多士 ！@Poortravellers窮遊
流心芝士拌飯配泡菜雞柳($82)
嗌呢個飯完全係因為見到「芝士」而吸引住，一層一層咁擺相當有心思，旁邊放咗芝麻紫菜，更加重要就當然係佢頂上面嘅芝士啦，用叉吉起真係可以拉到絲架。因為呢個有芝士，所以唔可以影太耐相就要食佢，如果唔係芝士會硬哂。食果時就直接將全部嘢撈埋一齊就食得，唔好睇佢個樣細細，整散佢勁大碟，如果1個人食應該會飽到癲咗。呢碟幾惹味，上面有拉得嘅芝士，食到咸香，有泡菜雞柳，唔太辣，仲有青瓜、蘿蔔、紫菜帶番d fresh嘅味道，更加特別嘅係佢有一層係甜甜地嘅南瓜蓉，撈埋飯食都幾得意。
食完主食就當然要食甜品啦，仲同朋友一人嗌咗一款。
亞朱媽 年糕多士 和雪糕大戰烤棉花糖和奧利奧($62)
個名真係超長，見到棉花糖同Oreo又忍唔住嗌咗，見到已經相當邪惡，暫時將減肥嘅念頭放埋一二邊先，年糕同棉花糖，兩個根本就係鬥拉嘅角色！
棉花糖烤得靚，外面脆入面軟綿，而且吉起佢仲見到纏綿不斷嘅棉花糖，多士中間夾住年糕，連切開都唔容易，多士烤得香脆，連埋年糕嘅煙韌，相當唔錯。由於本身中意食甜野，所以即使呢個係Oreo加棉花糖都唔覺得佢太甜，但如果唔太中意食甜就會覺得太甜啦，怕甜嘅可以選擇嗌紫薯。
亞朱媽 年糕多士 和雪糕大戰紫薯($63)
呢碟個外型好靚，呃like之選，紫色令人心心眼，中間仲有球咖啡雪糕。唔好睇佢咁紫，其實紫薯粉嘅味道唔太濃，有d淡呢。但中間嘅紫薯蓉加分不少，有令到紫薯嘅味道提升番d，上面仲有葵花籽，葵花籽嘅香味令到成個甜品好香，多士一如既往咁香脆，整體唔錯。
飲品方面同朋友嗌左兩款唔同既野飲，咁樣可以試多d野麻。
熱綠茶拿鐵($42)
有靚靚拉花，綠茶味甘香，雖然有拉花係上面，但佢竟然仲可以保持到熱嘅溫度，上面嘅一層綠茶粉令到綠茶味道更出。
熱紫薯拿鐵($48)
上面有紫薯粉，熱飲嘅紫薯味道更濃郁，但就有d飽肚，冬天飲夠哂warm。
呢間仲有Teaset，逢星期二至五如果嗌野飲食cake有8折呀。
Seoulmate Cafe
地址:西環西營盤第三街83號(顯示地圖)
電話:2104 6788
營業時間:星期二至日: 12:00-22:00; 星期一: 休息
圖文提供：Poortravellers窮遊
延伸閱讀
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
