【週末遊懶人包】尋「味」 大澳 遊
1. 棚屋靚景歎靚茶 大澳 榕樹頭
店主Charlene同Cliff熱愛旅行，經常到各地遊走，每次去完旅行都會大包小包咁返嚟，為嘅就係同大家分享佢哋去旅行發掘到嘅好物。因此，佢哋嘅café裏面就會放滿咗好多喺世界各地返嚟嘅商品，亦有一啲非賣品，用嚟同大家分享各地文化。
大家可以點選店主由越南等地帶返嚟嘅花茶，亦有 大澳 食材製成嘅食物同飲品。8至9月仲有期間限定嘅本地大樹菠蘿特飲。坐喺 大澳 棚屋再歎埋 大澳 出產嘅食物飲品，夠哂地道啊！
大澳 榕樹頭Tai O Banyan Tree
地址： 大澳 吉慶街68號地下（顯示地圖）
營業時間：星期六11:00–23:00、星期日11:00–20:00
電話：6999 8213
網址：https://www.facebook.com/TaiOBanyanTree
2. 愛貓人士好地方 貓澳MEOW
貓澳MEOW係 大澳 一間用貓做主題嘅café，裏面嘅貓貓都係流浪貓，店主German話希望可以透過呢間貓café帶比大家一個訊息：其實流浪貓嘅品性都係好好嘅，帶番屋企照顧都沒有問題。為了想大家多啲空間同貓仔親近，所以專登設計店內並無放置檯檯凳凳，讓大家盡情玩。
除咗同貓貓玩之外，店內仲有 大澳 出名嘅紫貝天葵梳打同沙冰，本身紫貝天葵已經具備清熱氣作用，今次café將佢變成特飲，鍾意貓貓嘅讀者於夏天遊大澳行到熱辣辣之時，可以考慮下嚟貓澳呢間café試吓 大澳 名物紫貝天葵。
貓澳MEOW
地址： 大澳 吉慶街67號地下（顯示地圖）
營業時間：星期二至日12:00–18:00
電話：9497 4206
網址：https://www.facebook.com/meowtaio
3. 只此一間 大澳 旭日黑白墨魚餅
其實為何要山長水遠走到大澳？為的，都係感受 大澳 那種純樸的小村風味，所以食也不例外。在市區食墨魚餅並不是新鮮事，不過口感都是粉多過墨魚，而今次大澳的小店，就真正做到真材實料、有版你睇！店主梁先生每晚都會打定翌日要賣嘅墨魚餅，保證新鮮。熱辣辣煎完之後，記者即時撕開墨魚餅，清楚見到粒粒墨魚粒在餅中，咬到彈下彈下。這種口感就像回到六、七十年代那種香港人踏踏實實的感覺。
一黑一白嘅墨魚餅滿足哂大家兩個願望，可以試吓純墨魚打成嘅白墨魚餅，又可以試下加咗墨魚汁嘅黑墨魚餅。店內仲有墨魚餅麵（$30/碗）提供，如果係肚餓嘅話就可以連麵一齊叫啦。
除馳名墨魚餅外，旭日嘅龍蝦湯同咖哩魷魚鬚都可以當掃街咁叫嚟食。
不過因為舖頭裝修嘅原因，旭日最近都唔會開門，店主梁先生話最快都要8月尾先會開返，所以大家想去嘅話記得打個電話去問問先啊～
旭日
地址： 大澳 永安街47號地下（顯示地圖）
營業時間：星期一至日07:00 – 17:00（逢星期三休息）
電話：2985 6001
4.自家種 班蘭香草雞蛋仔
班蘭蛋糕就食得多啦，班蘭香草雞蛋仔就少見喇。 大澳 石仔埗街嘅士多仔就出咗呢個用自家班蘭葉製成嘅班蘭香草雞蛋仔，除咗雞蛋仔之外，店主張太話個班蘭香草格仔餅，個餡可以揀咖央醬，佢仲有出crossover口味嘅紫貝天葵酸梅湯同話梅柑桔添～
班蘭香草雞蛋仔
地址： 大澳 石仔埗街119號（顯示地圖）
5. 街知巷聞 財叔糯米糍
財叔嘅糯米糍同茶果都係每日即整即賣，保證新鮮熱辣，所有貨品都會放喺發泡膠箱內保溫，用呢個方法保溫喺香港市面上已經好少見啦。就算記者下午3時多才去到，拎上手嘅糯米糍同茶果都仲暖笠笠，咬落去仲食到軟淋淋又煙韌嘅外皮及十分足料嘅內餡。有一點真的要提一提大家，由於好多人一入到 大澳 就要買返件財叔的產品，再加上財叔年時已高，出產有限，所以通常都好早賣晒，想encore都無！
茶果財
地址： 大澳 石仔埗街106號（顯示地圖）
6.特色棚屋睇全景
嚟到 大澳 玩咗一日，食完買完就走？No～可以睇埋個棚屋靚景先走。咁啱我哋採訪嘅 大澳 榕樹頭店主Charlene同Cliff就話我哋知，原來喺佢地對面嗰間棚屋嘅主人好歡迎大家去佢屋企參觀，由間屋嘅露台望出去，向右望，可以望到一大排棚屋水鄉景；向左望，可以望出大海睇海景。佢地仲話喺嗰度睇日落就最perfect，如果12月嘅時候去仲可以見到個咸蛋黃喺大橋正中間落下添，所以如果唔趕時間嘅話可以睇埋日落先走。
