經典港式平民本土味 全港11間 好食車仔麵 灣仔咖喱魷 石峽尾肥哥最掂!
撰文：Ruby 攝影：Hong、Mark、KwanYiu、Meck、新傳媒資料室
即睇10間必試 好食車仔麵
1. 車仔麵之家 上癮生炒咖喱魷
60多年前街邊檔起家，除了捧着麵立食吃的特色，咖喱魷魚最馳名。每朝在廚房把阿根廷乾魷、自家製咖喱醬生炒爆香，濃濃咖喱香味湧出店外，魷魚炒得夠辣又入味。
19款餸料全部都是傳統經典選擇，酸齋外脆內軟；牛腩口感軟滑，五香味濃。湯底每日以雞骨、豬骨熬煮，又定時加新骨來熬，越熬越濃。麵條食落軟硬度剛好，加1、2匙招牌咖喱辣醬，錦上添花。
車仔麵之家
地址：灣仔晏頓街1號A舖（顯示地圖）
電話：2529 6313
營業時間：星期一至六7:00am-6:00pm（星期日休息）
2. 肥哥車仔麵 刺激爆炒辣汁
店子鄰近文青熱點JCCAC，老闆肥哥賣麵30多年，由推車仔做到入舖。湯底以豬骨熬湯，還加入大量冬菇椗，使湯味更見鮮甜。
辣汁更有4種辣度，以大量新鮮指天椒、乾椒、指天椒粉煮成，更會手切新鮮青紅小辣椒加料，平日吃慣譚仔中辣的小編，試1匙小辣，已經標汗！車仔餸有坊間少見鮮牛肉，口感嫩滑；更有原個雪耳，索晒湯汁好特別，亦堅持要做到嗱喳麵不嗱喳，豬皮用火輕燒，再人手箝出細毛，好講究。
肥哥車仔麵
地址：石硤尾白田偉智街38號福田大廈地下55號（顯示地圖）
電話：2529 6313
營業時間：星期一至六7:00am-6:00pm（星期日休息）
3. 華記小食店 王子創意車仔餸
隱藏在青衣涌美老屋邨，店主自稱「車仔麵王子」。其實上世紀60年代，王子的爸爸已在青衣大街賣麵，後來父親病逝，王子二話不說回家接手，傳統餸料跟足舊時做法，同時藉着外遊的見識，將新元素滲入車仔餸中。
30多款餸，有傳統豬紅、蘿蔔、豬皮；創意也有炸雲吞、鯪魚肉加入粟米、麥皮，口感豐富；煙燻雞翼以綠茶燻香，用黑糖調味，煙燻味清香，肉質嫩滑。還有昆布汁鮮吊桶、自家磨豆花等隱藏菜式，不過只供應給熟客，能否吃到就要講緣分。
華記小食店
地址：青衣涌美老屋邨90號地下（顯示地圖）
電話：2436 0710
營業時間：星期二至日 7:00am-3:00pm
4.永年士多 回甘藥材湯
元朗地標，50多年歷史，由士多雜貨到賣腸粉魚蛋車仔麵。食物由屯門中央工場製作，成品運來店中再翻熱、調味。
湯底用了廿斤豬骨、老雞熬製，還有果皮、當歸、甘草等材料，令湯底多了一股藥材的甘甜，頗獨特。傳統餸料水準中上，大腸半肥瘦，豬皮乾淨冇沙，豬紅軟熟入味帶蒜香；更有流心蛋，蛋汁濃稠有蛋香，值得一讚。
永年士多
地址：元朗教育路88號寶城洋樓2-4號（顯示地圖）
電話：2477 3816
營業時間：星期一至日 12:00nn-10:00pm
5.新記車仔麵 靈魂辣汁吸擁躉
其實擁躉一向多，其靈魂之辣汁是招牌，據說是老闆每晚凌晨兩點，邊炒邊撈的成果。辣汁質地濃稠，帶點微微嗆喉，啱辣迷。
豬骨湯底熬至少兩小時，出奇地有回甘。車仔餸平均水準中上，滷水雞翼尖、豬腸入味軟腍，炸魚皮入口脆卜卜。定價相比其他店高，坊間每款餸最低$7，這裏就$10，分量卻比正常少4分1。
新記車仔麵
地址：銅鑼灣登龍街49號地下B舖（顯示地圖）
電話：2573 5438
營業時間：星期一至日12:00nn-11:30pm
6.榮安小食 米芝蓮街頭美食推介
2015年入選米芝蓮10大香港街頭美食。店內員工至少半百，發黃的牆身、銀色筷子筒，有人覺得懷舊、有人覺得邋遢。30多年前由舊式士多起家，自家製滷水雞翼最熱賣，後轉型車仔麵，成荃灣地膽至愛。滷水汁香味出眾，餸料如大腸、雞翼尖、豆腐都香得有層次。不過環境較細，來吃要排隊，落單、取麵、飲品都要自己攞。
榮安小食
地址：荃灣大河道24號B地下（顯示地圖）
電話：2492 6300
營業時間：星期一至日11:00am-12:00mn
7.榮記粉麵 遊客人龍店
銅鑼灣無人不識的名店，門前人龍不絕，連遊客都識搵上門。蘿蔔、豬紅、魚蛋水準正常，主打雞翼尖算滑；辣油鮮紅、微香，湯底帶甜，至讚是大部分時間會免費送幾棵時菜配麵。不過車仔麵最多只可點5餸，樓面阿姨解釋，是因麵碗太細……不太flexible。
榮記粉麵
地址：銅鑼灣糖街27號A地下（顯示地圖）
電話：2808 2877
營業時間：星期一至日 11:30am-10:00pm
8.文記車仔麵 每日不同餸料
相比起其餘9間店，文記年資算短，開業5年。身處麵食名店雲集的深水埗，卻經常滿座。車仔餸選擇超多，每日近50款，必點香脆豬油渣，一咬甘香豬油滲出；更有上湯柚皮、辣味螺肉、陳皮魚蛋等經典餸。不過水準飄忽，同一個阿姐剪餸，柚皮時厚時薄，影響口感，豬腸亦切得時大時細，較為隨意。
文記車仔麵
地址：深水埗福榮街121號地下（顯示地圖）
電話：9059 5104
營業時間：24小時
9.九記牛什粉麵 牛雜選擇最多
開在鵝頸橋街巿熟食中心，白領至愛，午巿必現人龍。牛雜款式選擇最多，牛腸、牛膀、草肚、金錢肚、牛沙瓜，說得出都有。老闆九仔每朝6、7點入手新鮮牛雜，花大量工夫處理，招牌牛腸，重複清洗裏裏外外，唧走肥膏。同場也有手打鯪魚餅，彈牙，魚味鮮濃。
九記牛什粉麵
地址：灣仔鵝頸橋街市熟食中心8號檔（顯示地圖）
電話：2988 8960
營業時間：星期一至日7:00am-5:00pm
10.太安樓林記 自家咖喱汁
太安樓內的熱門車仔麵店，最正是門口設開放式車仔檔，連Viu TV電視劇《瑪嘉烈與大衛》都去取景。40年歷史，家庭式作業，媽媽執餸、阿仔輔助，1碗4餸麵大約35蚊，分量好足。餸料中規中矩，自家調製咖喱汁、辣汁味道層次反而豐富惹味。堂食都以發泡膠碗上，不夠環保。
太安樓林記
地址：西灣河筲箕灣道57-87號太安樓地下A34A舖（顯示地圖）
電話：從缺
營業時間：星期一至日12:00nn-3:00am
11.車品品 個性老闆台式風味
性格小店，只做晚市，星期一及紅日又休息，開門不準時，通通講老闆心情，小編去食都試過摸門釘。不過粉絲眾多，不時有食客排隊等開門，上菜速度極慢，柯打後等半小時才有得吃。餸菜限量製作，走台風，魯肉餃、滷水蛋（鐵蛋），連滷豬腸都是帶甜的台式風味。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
