豬皮配安格斯牛肉?! 著名私房菜開Burger店 |西環有咩好食|
廣告
大師級人馬搞搞新意思開概念店，製作特色漢堡，價錢同一般快餐店差唔多，但就可以食到色香味俱全又夠創新嘅漢堡。女主廚Karen係創作私房菜「水月」嘅大廚，最擅長整煙燻食物，又識製作分子料理。今次Karen決定同弟弟合作開新店Opium，雖然價錢較大眾化，但係用料並不馬虎，會選用美國安格斯牛肉、北海道新鮮海膽等外國材料，而製作過程亦相當認真，可謂物超所值。
豬皮大家就食得多，但係包夾炸豬皮真係第一次聽。Opium招牌炸豬皮漢堡製作過程繁複，先用鹽水烚豬皮，再以攝氏75度低溫烘乾，之後攞去炸，咪話唔嘥心機。香脆嘅豬皮配安格斯牛肉，再加上芝士番茄同自製西梅黑醋蜜糖BBQ汁，食落口感非常豐富，醬汁味道濃郁，但唔會喧賓奪主，可中和油膩感。聽落整一個要花好多時間，但價錢只需＄68，所以大家值得一試。
同樣68蚊，另一個漢堡有埋視覺享受。只要打開個外賣盒，就會見到個包出煙，點解嘅？點解嘅？只因主廚最鍾意整煙燻食物，上至私房菜嘅煙燻口水雞、煙燻清酒高湯鮑魚，下至快餐漢堡包都要煙燻！今次主廚就用澳洲櫻桃木燻漢堡，食落會更有層次感，有輕輕嘅燻味。
呢個就係大廚喺私房菜水月嘅時候，最喜歡製嘅煙燻麻辣口水雞，難怪嚟到整漢堡包都嚟個噴煙之作。
有時食得太多牛肉漢堡，亦可以試下煙三文魚芝士三文治配炸魚皮。打邊爐就食得多炸魚皮，但好少會咁樣夾嚟食，確實夠創新！
除咗漢堡包，店舖亦有其他小食。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
