【自助餐放蛇起底組】$168韓燒 炸雞小食任食
廣告
在尖沙咀食韓燒閒閒哋都要二、三百蚊先落到樓，今次俾我哋發現了這家韓式餐廳，韓燒再加炸雞等小食任食都係$168，食唔食得過？立即去片睇試食報告啦！
31款食物選擇 110分鐘任食
雖然$168咁平，但任食時間只有110分鐘，兩個鐘都唔夠，把握時間！食物選擇方面有31款任揀，肉類只有幾款豬肉和雞肉，牛魔王要失望了！熟食有炸雞~冷麵及便當，選擇感覺都豐富。
沙律、燒肉、炸雞、泡菜炒魷魚、水冷麵︴泡菜海鮮湯、手搖便當飯等共31款選擇。
韓燒燒豬雞肉 必食厚切味噌豬腩肉
肉類選擇最吸睛的是厚切豬腩肉，有4款味咁多：宮廷甜味、原味、味噌及辣味醬汁，送到嚟件件都好肥美，真喺厚切嫁~而且醬料都落得好重手。肉質軟滑，4款入面最好食是味噌，好惹味！辣味唔算太辣，係食完入喉嚨後才有微微辣度滲出，呢兩款必食！另外個兩款…原味勁鹹；甜味係無味，千萬唔好點!另外香草雞腿肉及五花露筍卷都唔錯，食得過！
炸雞手搖便當食到飽
炸雞炸雞炸雞！去食韓國嘢一定要點啦！呢度有得任食喎，不過炸雞全是雞翼，無得一啖吞，有原味及辣味選擇，上菜都唔等好耐，送上嚟時熱辣辣，同埋非常脆，好香口，辣味係Must try！第一啖食落去是甜味，第二啖開始辣辣哋，越食越辣，好過癮！會送幾顆酸蘿蔔粒，但係無幫助既，因為真係好辣！
手搖便當同Menu張圖好有出入，好頹，太陽蛋蛋消失咗，只有兩片午餐肉、司華力腸、泡菜及少量醬汁等。蓋返飯盒用力搖了分幾鐘，搖完後醬汁都未能蘸滿整個飯盒，飯粒太硬，未夠軟熟，午餐肉同司華力腸味道正常，玩下ok囉。
以為手搖飯盒已經夠頹，但原來泡菜煎餅仲頹，平時餐廳啲泡菜煎餅放隻細細哋的醬料碟都無咩野，但呢個一放醬料碟都差唔多遮晒個餅喎，而且而家啲粉好貴咩？薄到咁…….似食緊蘿蔔及蒽的粉糰，泡菜係無味的。
總結：
食物選擇都ok，如果有牛肉及更多蔬菜會更Happy。小食和熟食選擇都唔錯，但可惜除炸雞外，其他都頹頹哋。服務和環境方面都有加返分，店員好nice，上菜速度亦快。
總分：7.5/10
