【出街搵食】超爆場！西環好食火鍋老店！鮮甜番茄雞腳湯底～手切牛頸脊＋刁鑽火鍋配料 | 西環火鍋 |
廣告
非任食的火鍋，逐碟計錢，遇著食物質素不好的，真係會蝕到入肉！西環這間人氣火鍋老店，連平日都要預先Book位，招牌湯底用番茄、豬骨、老雞等熬足8小時，味道鮮甜。牛肉均是手切，牛頸脊有咬口得來好有油香，另外更有多款限量的刁鑽配料例如豬王喉、烏魚扣和田雞扣等，坊間少見，邊爐友組團出發啦！
Text、Photo：新假期傳媒資料室
旺爆！西環好食火鍋小店 刁鑽配料夠爆趣
在西環屹立廿多年的火井是火鍋界的表表者，未搬舖時位置勁隱蔽，但晚市人流不絕，明星客多不勝數。年前搬過了隔籬街，更多人食，連平日都好易爆場，一定要Book位先食到。
火井招牌湯底有番茄、雞腳、枝竹、豬皮等，味道好鮮甜，愈滾愈有味。店中有不少聞所未聞的刁鑽配料供應，如烏魚扣、田雞扣和豬王喉等，極為罕見！店內亦有用花膠及魚翅仔打邊爐，坊間火鍋店少用這些乾貨，皆因準備工夫多，事前要浸發及啤水兩三日。其餘的火鍋料夠靚，無論牛肉、內臟、丸餃或蔬菜，一看便知新鮮。
火井招牌湯底有番茄、雞腳、枝竹、豬皮、粉腸及鹹酸菜等配料，加豬骨、老雞及火腿熬上八小時，呈奶白色的湯頭夠厚夠味，味道好鮮甜，直頭有媽媽煲的老火湯味道。
全部牛肉均是人手切，唔用機切！手切牛頸脊夠油香，好有牛味，入口鮮甜軟滑。
來自翅裙上邊位，翅針粗而多，雖不是極級靚貨，但以此價錢吃到此水準算唔錯。
即烏頭魚的胃部，一條魚得一個，一碟有廿個，要老闆叫相熟的魚檔留貨先有，一日只得幾碟，新鮮有彈性，咬落脆卜卜，罕！
即田雞個胃，爽中又有田雞肉香味，浸住花雕酒上，吃時酒香慢慢滲出。
即豬的大動脈，白雪雪洗得好乾淨，又薄又脆好爽。
手打的墨魚滑幼滑彈牙，比墨魚丸口感更細緻。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
