大家樂出「波仔飯」？新張＄5奶茶吸客 |中環有咩好食|
簡潔店面 設「立食」位置
「大家樂一百加」嘅店面以白木牆身、木造地版為主，甚有簡潔「北歐風」嘅設計，不論Logo設計同店面佈置都同平日快餐店嘅形象好大出入，完全唔似係「平民路線」速食店！
冷櫃主要分飲品冷櫃區及食品恆溫櫃兩邊，飲品櫃除咗有普通汽水外，亦見有唔同牌子嘅貴價果汁、水、沙津同三文治售賣，旁邊的水吧依舊可以沖調飲品，感覺都幾High-class。而恆溫食品櫃就為個飯盒保持熱溫，呢個就係同叮叮飯嘅分別，大家可以在熱食櫃揀選完之後，飯盒即時食用，真係快過快餐喎！
另外，店內亦仲有零食架，有唔同嘅港式小食，包括甜話梅、特級風琴魷魚、古法製檸檬薑等！
買完個飯仲要慢慢拎返公司？唔駛煩啦！店內亦設有「立食」位置，畀客喺度即刻買、即刻食，快快手搞掂！
大家樂「速食飯」種類唔少，中式、西式，竟然連車仔麵都有，而價錢都係四十蚊有找，睇嚟值得一試！而以下部分熱葷食品嘅包裝備有隔熱手挽，客人唔駛驚燙親手，呢個細心位值得加分。店內有分早餐、午餐同下午茶時段，供應唔同食物。
早餐時段：
一哥糯米雞套餐 ＄27
呢個糯米雞份量夠大，早餐食完應該可以直撐到Lunch Time呀！
午餐時段：
芝士厚切一哥焗豬扒飯 ＄39
呢個「焗豬飯」平時喺餐廳食起碼都等15分鍾，而家有得即食又幾吸引！
芝士焗肉醬扁意粉 $36
排骨四寶三色米蒸飯 $38
睇相望個四寶飯就幾足料啦，唔知入面會唔有啲蒸飯焦呢？
下午茶時段：
「隨你加車仔麵」＄32起
速食店有「車仔麵」買走真係第一次聽，客人可以喺食品櫃揀完麵底（有油麵、米線、烏冬同米粉供選擇）後，就喺配料紙揀配料，廚房就會即整即包！
＄5奶茶益中環友
由於開業初期，「大家樂一百分加」就推出咗5蚊奶茶吸客，適用於任何時段，真係唔去買佢地嘅「速食飯盒」，去飲返杯平奶茶都好。
大家樂一百加 CdC Hundred & More
地址：中環中心 1 樓 3 號舖（顯示地圖）
電話：2445 7889
營業時間：星期一至五 7am – 6:30pm，星期六 7am – 5pm，星期日及公眾假期休息
延伸閱讀
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
