【自助餐放蛇起底組】上水快食一粒鐘 $68 Lunch Buffet
遠睇似迷你酒店buffet 近睇……
放眼望去，自助區域都唔細喎，好似mini mini版的酒店buffet，有熟食、炸物、壽司，店內座位多，入座不用等位，行近少少睇下有咩食先！
熟食熱盤Total有7樣，白汁雞皇意粉、椒鹽三文魚頭同滷水三寶望落正正常常，而紅酒牛尾第一round得返零碎肉塊，不過等咗十幾分鐘後都有refill，都大大件同整齊。但其他幾樣就有啲出事！韓式辣醬炒年糕痴埋一嚿，韓式粉絲醬炒唔勻，搞到兩截色之餘又無味，大根炆牛腩又一出被人搶晒。
嚟到試食時間，refill了的牛尾大大件，炆得夠淋夠入味，可以喪encore喎！辣醬年糕唔夠熱，食落凍冰冰，嗰熱櫃喺咪唔熱啊？仲有一啲都唔辣囉，無味！韓式炒粉絲近睇見到有兩截色啦！不過最算喺有醬嗰pat粉絲，睇落有顏色，但食落喺無味囉！雞皇意汁白汁味都喺好淡，但啲雞都喺滑嘅。
烤肉刺身無你份 食甩皮甩骨壽司
自助區另一邊有好多生好多生肉，不過……都唔關我哋事，$68喺唔包韓燒，想食要俾$128食。另外仲有炸物、湯同冷盤同壽司區，湯品清晒都會有店員refill，抵讚嘅。刺身原來喺無得俾你食，只限夜晚放題咋，但可以食嘅卷物都核核特特，另外部分凍蝦有黑色點點，睇見都唔開胃！
Fancy甜品區 睇到唔食得
熟食同冷盤都喺麻麻，但嚟到甜品區，嘩！極fancy!有朱古力噴泉又有棉花糖機，好正啊！！！有棉花糖、水果片可以自己dip入白朱古力噴泉裡DIY，有得玩下抵讚！ 不過……原來其他甜品都喺睇得唔食得嫁！嗰香芋白朱古力Mousse同藍莓芝士蛋糕賣相OK，但一食落口伏味超濃，前者Mousse唔似Mousse，後者芝士酸味奇奇怪怪，嗰樣咁靚呃人嘅！
臨最後15分鐘店員便會過嚟埋單，時間一到，如果佢記得的話就會過嚟趕你走，態度有啲唔好，雖然夠鐘你叫我離座喺超級正常，但其實語氣方面可以客氣少少，而家聽落有啲唔舒服囉。
總分:4.5/10
望落選擇其實頗多元化，熟食、炸物、冷盤、甜品都有，如果你只要求食飽都無問題嘅，但味道方面實在太求其，著實要扣超多超多分。另外亦有refill有執碟，店員都有禮貌(除咗趕人走嗰陣)，而呢個價錢另外要收加一，實收$75，咁我寧願俾四、五十蚊食個足料足味、唔會乜都淡茂茂嘅茶記好過。
