Asia Miles遇積分大盜「不了了之」當了事@杜遊珍

Mar 1 2015

阿珍最近收到舊同事報料，指身邊頻頻有朋友畀人偷咗Asia Miles 嘅飛行里數。「黑客入侵」事件其實一月頭已經見咗報，阿珍心諗：舊聞一則，做乜依家先嚟大驚小怪！誰不知旅遊組同事都話有朋友同樣中招！事隔咗成個月，報紙之前又「大大隻」標題話警方已經拉人，咁究竟依家搞邊科？見事態嚴重，梗係要幫手搞清楚來龍去脈啦！

據舊同事所講，朋友A喺今個月5號發現兌換清單裡面多咗項交易，一個大陸人（憑名推斷）用咗佢成4萬分嚟換張由北京飛溫哥華嘅機票。咁都不特止，個強國人仲跟手改晒佢所有聯絡方法，好似電郵地址同電話咁，唔係咁「翹」留意到就真係神不知，鬼不覺喇！大嗱嗱成4萬分，即係消費咗8萬蚊先儲到㗎喎！A梗係「擒擒青」報警同通知返Asia Miles 公司，點知原來對佢地嚟講已經唔係咩新鮮事，仲話最近持續收到好多類似嘅案例，不過就先旨聲明唔會發電郵提醒會員。阿珍聽到就嬲，咁大規模嘅個人資料洩漏，依家擺明係「衾」得就「衾」，刻意隱瞞嘅啫！

追溯返篇新聞，原來警察拘捕咗嗰4個，都只不過係幫手接贓套現嘅「卒仔」，至於幕後嘅內地主腦嗰陣就寫「正在追緝」。過咗一個月，當大家對於「盜用里數」嘅記憶日漸丟淡，以為件事已經告一段落啦，但實情係單新聞無咗下文咋！個積分大盜睇嚟都仲係「逃之夭夭」，各位千祈唔好掉以輕心啊！

PS. 霸氣同事教路，如果飛行里數離奇消失,而Asia Miles電話卻接駁到2046都係「未能接通」，咁就要「單刀直入」寄封電郵畀主席，第2日啲積分就會「原封不動」咁返番晒嚟！