$260 DIY 紮染漁夫帽+Tote Bag 平過你買

Aug 25 2015

話咁快夏天就已經過咗一大半，未嘆夠陽光與海灘，想繼續將藍天白雲留喺身邊？可以試吓近年興起嘅紮染，$260玩齊文青漁夫帽+Tote bag，包材料包教識你，染出獨一無二嘅隨身物，色彩繽紛五顏六色又得，一片藍天文青路線亦得，得咗！

紮染主要以布料為主，基本上所有布製品都可以染色，不過當然最好係用白色底色啦，如果唔係紮染嘅時候就會受底色影響，未必染到想要嘅顏色。今次嘅工作坊，提供T恤、裙、環保袋同漁夫帽選擇，同時亦鼓勵大家將自己嘅舊衫帶嚟紮染，咁就可以舊衣新著，既方便又環保。

唔想日日對住灰濛濛嘅天空，所以記者今次決定自製一個藍天，將漁夫帽紮染成藍色，咁就可以去到邊都抬頭望到藍天啦！
步驟1：褪漿
由於衣物表面通常有一層鎖色嘅「漿」，所以要先褪漿，咁先可以上到色。

步驟2：紮
紮法普遍分為3種紮法，分別係螺旋、條狀同埋雲石，摺完之後用橡筋紮好定形。3種紮法都好簡單，不過喺染色時雲石就比較難拿捏喇。

步驟3：染
紮染嘅顏色主要以3原色為主，可以喺上堂之前話定畀導師知想要咩顏色，定佢預先準備好。呢部分最難嘅就係顏色配搭，由於染料會滲色，所以如果將幾種類似嘅顏色一齊染，就可能會溝埋變成一種色。

步驟4：加熱
由於工作坊時間有限，所以會將作品加熱，減少鎖色時間。

步驟5：洗走多餘染料
染料含有鎖色劑，所以即使用水沖都唔會甩色，只會沖走表面上多餘染料。

完成！
只要等佢乾返，呢頂獨一無二嘅「紮染藍天」就完成喇！

試玩報告：
紮染最難就係控制顏色，即使好似記者咁只係落咗一隻色嘅染料，出嚟都會有深淺不一。另外，落色嘅時候要記住染料會滲開，所以就算染事前記者刻意留咗少少白位冇染，到最後都幾乎成頂帽變咗藍色，由藍天白雲嘅幻想變咗海洋嘅感覺，不過一樣咁靚。
但係呢個正正就係紮染最特別之處，未到最後，你都唔會知自己嘅製成品係咩樣，而且即使用同樣方法去染，出嚟嘅效果都可以好唔同！