阿波羅雪糕姐姐被指趕收工？西客關門前買雪糕 反被網民圍攻｜飲食熱話

阿波羅姐姐被指落閘趕收工？西客關門前一刻買雪糕

於「雪糕關注組」內掀起過千留言罵戰，源於群組中的版主於討論區內發文，指自己於關店前17分鐘、停售雪糕前2分鐘到於旺角商場T.O.P的阿波羅雪糕店買雪糕 ，他指出「當時有兩位職員姐姐，佢見到我哋幾個好似大為緊張咁，然後即刻沖去門口落閘」，版主成功購入雪糕後因趕車急著離開時，才發現閘已鎖，「我同佢講我趕時間，於是佢好唔情願咁搵鎖匙去搞開個閘，搞咗2分鐘先開到，然後就無啦啦趕晒舖入面啲人一次過走，連其他食緊雪糕嘅客食咗半嘅都要出門口。」質疑職員趕收工面在關店前15分鐘便落閘太誇張。

網民批無同理心 事主食雪糕食到走火入魔

帖文一出即引來大量網民留言，指阻人收工的樓主是「西客無誤」，「最後一分鐘買雪糕唔算西，人地同你好來好去，你就死要人忙緊都要幫你0秒開閘再放上網就係正一西客，等多陣洗死？」、「趕時間咪唔好食囉！你一篇文，分分鐘人地比人照肺，呢間鋪頭既姐姐出名俾心機！唔該反省下啦！」、「點解要令人地生活唔好過呢，真係小事一單，唔鍾意咪下次唔好幫襯囉，使唔使搞到咁大件事」

不少網民認為職員做法合理：「人地落閘截龍有咩問題？ 其他店都係早少少落閘截客」、「其他街客見到鋪頭有客，好大機會都會衝入去幫襯，人哋得兩個人，又要執嘢，又要洗機，唔鎖門，應該無其他方法截人入去」，同時斥責事主小事化大，「佢哋咁慌張落閘係處理得唔好，不過你咪體諒吓佢哋囉，又未必要擺上網講嘅，分分鐘比佢哋公司睇到你呢段嘢而內部處分兩位阿姐都唔定」，一面倒地炮轟事主無同理心。

事主：我last order前買個外賣，真係有問題？

發文圍爐不成反被圍攻，事主有進一步回應網民留言：「講真收鋪前17分鐘買杯Takeaway雪糕，真係算係西客嘅行為？作為一個客，會唔會expect自己買杯雪糕，結果俾人鎖咗喺間鋪入面？」事主見被群起攻擊也不甘示弱，「我冇講過佢早截單有問題呀，我個point係依家我行入間舖你有權賣或唔賣，我冇逼過佢要賣埋俾我，我8:43買，點解講到好似姐姐皇恩浩蕩咁？我就係西客？」、「佢收舖時間係9:00，但佢為咗唔想出面嘅人入黎，就8:45鎖閘，令到入面嘅客出唔到去，仲要等佢處理完所有訂單先開門俾大家，咁你舖頭嘅問題做乜要客去suffer?」、「落半閘係ok，但真係未見過未過未過營業時間就落到要用key開，同埋更加未見過舖要客因為就佢工作，要等佢處理完所有訂單先開門」。

事主更堅稱自己講得好溫和，純粹想分享事件，反指是網民把事件鬧大：「只係大家一人N個reply好似講到好大件事咁，係大家推到件事咁大」，同時亦批評網民言論不理性，「只係覺得香港做服務業好幸福，職員做乜都可以體諒，有少少微言就叫做西客冇同埋心，職員做乜都係情有可原，總之投訴就係西客啦」，認為自己的批評理直氣壯。