馬鞍山超市驚現黑心梨 原箱韓國梨切開黑心 水果達人解答4大原因｜飲食熱話

超市買原箱韓國梨 切開全部是黑心梨

有網民於Facebook「超市關注組」出post，指自己在馬鞍山銀湖天峯一間大型超市買了一箱韓國梨，「點知切開第一個已經由內爛到外，再開第二個也一樣，馬上再檢查另外幾個，發現爛的位置全部都被調到底下及被海棉紙完全遮蓋住，真係衰到無人有。」樓主更上載了兩張照片，見到一箱梨，當中有5-6個切開了，每一知的果肉部分都有不同程度變黑，旁邊另有3個未切的梨，都有海棉包著，外表正常，未覺有明顯瘀黑。

網民：生果做特價梗有問題

有眼利的網民發現樓主所買的韓國梨是特價貨，留言指：「做個特價梗有問題，唔係就到期就過咗雪（應該是指雪過龍），你選擇買就要承擔風險。」另外亦有幾個有類似看法的留言：「佢做得特價都唔方好野」、「超市/街市唔會死錯自己，做得特價推出去，即係就嚟爛或者爛咗嘅先會咁平，仲有切好晒一碟碟嘅生果都唔好買，通常用爛生果去切。」

樓主表示翌日已將全箱梨拿回超市，超市亦肯退錢，不過仍然選擇出post公開事件，因為他「只想提醒大家小心一點」，並覺得「點解特價就一定要有問題？我哋都要真金白銀咁比錢嫁… 佢哋將爛嘅部份完全咁收埋係底部同用海棉紙遮住，係佢哋操守問題。」同時他希望「他們也有機會看得見而下次不敢再用相同的手法去欺騙其他人。」

網民分析「黑心」原因

有網民留言分享，之前同樣買了黑心梨：「又唔係平，十幾蚊個，反而我上星期買20蚊4個好靚。」有留言解釋：「而家貨運延誤重係好嚴重，加埋颱風，到香港時間比以前耐五至十日，生果好易爛。」、「部份生果不能雪得耐就會有好大問題或出問題，尤其橙、蘋果、梨。大部份是船運，當地採摘後已放雪櫃一段時間、船運期間又是放在冷凍櫃…」

生果達人：估計是過熟或凍壞

就此事，新假期編輯部向對各種水果非常熟悉的「一菓欄」店主Elmo查詢。Elmo表示梨變啡色主要有4個原因：

1. 撞瘀——可能因為運送期間撞瘀了，由入面瘀到去出面；不過，如果是這個情況，啡色部分會變成啫喱狀，或較腍身。
2. 過熟——因為梨是由入面熟出去，過熟會由入面開始變啡；不過，如果過熟，會有類似酒咪或酸醙味。
3. 氧化——表面可能未必為意有些小傷痕，有時會氧化到入面，都會令入面變啡。
4. 低溫——梨的最佳儲存溫度是1-2度，韓國梨一般都會用船運，有時會不小心把溫度調到0度或-1、2度，可能會令梨一部分結冰，當放回室溫解凍時，就會有機會變色，但卻不會影響梨的味道。

Elmo表示因為不能聞到樓主的梨的味道，又不能摸到，所以上述4個原因都有可能，不過，估計最大機會是過熟或凍壞。