【尖沙咀】熔岩蛋漿飯！Oppa最邪惡美食襲港！
FB有絲打曰：「深夜出美食post是一種原罪啊！」，有罪惡嘅地方自然有我許sir，為咗查探下呢個飯有幾咁邪惡，第二日即刻單人匹馬去咗尖沙咀搵呢間新韓國食店試食！
就係呢間位於尖沙咀韓國街（金巴利街）的Oppa Coffee Bar Restaurant，原來係一對韓港情侶喺今個月21號先正式試業！成功征服韓男，為港爭光嘅老闆娘Sugar甜絲絲咁同許Sir講，與韓籍男友想在尖沙咀引入香港較少見的韓國美食，仲即刻推薦咗幾個菜式叫許Sir試試！
推介〔一〕：熔岩蛋漿飯
第一個推介嘅，當然就係呢個熔岩蛋漿飯啦！老老實實，同濟洲牛島的正宗蛋漿飯「漢拿山炒飯」（한라산볶음밥）嗰種大堆頭蛋漿的震撼感係有少少距離嘅，但賣相同樣吸引！此雞蛋溶岩炒飯共有五種配菜選擇，包括泡菜、海鮮、火腿、章魚同雞胸。
當Oppa侍應呈上溶岩炒飯，就會即刻將蛋漿淋係鐵板上面，再鋪上Mozzarella Cheese係上面然後反炒。炒一分鐘左右，芝士同蛋漿都同炒飯完全融合！許Sir我就高度推介大家食泡菜雞蛋溶岩炒飯，事關蛋漿同芝士既香味，再配上泡菜炒飯的微辣，絕對係perfect match，許Sir唔洗５分鐘就成盤食哂，差少少就食埋個鐵板！
其他飲食資訊：網上瘋傳！韓國蛋漿飯 & 海鮮九層塔大起底！
推介〔二〕：芝士排骨
仲有其他芝士系列，不論排骨、雞翼、雞腿、八爪角定雞腳，都緊要識得玩「拉芝(士)」，極之邪惡！許Sir就試咗芝士排骨（韓文讀音：痴書疼街便），排骨以多種韓式香料醃製，炆到腍身入味，配上芝士香，未來得及recap任何語言，就啪啪啪咗幾條排骨落肚！
其他推介
入到韓國食店，點都要試下炸雞喇。呢度嘅炸雞最貼心的地方，係可以任選兩種口味，共有五種口味選擇，包括原味、辣味、醬油、卡邦尼同蒜香，即叫即炸，粉漿上得均勻，質感薄而脆，不易散碎，吃得出以新鮮靚油去炸，大家不妨放開懷抱用手食，食完都唔會成手油淋淋！
好啦，介紹咗三款邪惡美食，為免太heavy都要介紹番d輕盈少少嘅，女店主就叫各位記住喺下午2點至6點的時間去飲杯咖啡，事關下午茶時間就會將餐廳遙身一變化身韓式cafe，除咗有11款精選Coffee之外，最重要喺不久將來會推出韓式甜品！
下午茶必試
雖然未有甜品食，但許Sir都試食咗呢個韓式三文治，以草莓醬搭配充滿什菜的煎蛋餅與火腿，鹹鹹甜甜的配搭，有趣之餘感覺清新！
門面座位
店面不算大，約坐４０人左右，相信許Sir今次介紹完，又會引起一陣排隊熱潮，不過唔緊要，事關店舖由二月開始，由早上10點開到凌晨4點，記住凌晨排隊唔好嘈住街坊呀！
地址：尖沙咀金巴利街1號F
營業時間：10am – 4mn（正式營業時間由二月開始，二月前會時間營業至12mn）
更多本地新食事推介：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
