點揀有營養 椰青水 ？5大牌子大比拼

營養師咁睇

包裝椰青水同新鮮椰青水嘅營養價值會唔會差好遠？有見及此，我哋請教註冊營養師(澳洲)梁皓婷，問下一啲同 椰青水 有關嘅營養問題。

營養價值同新鮮 椰青水 相約

「每100毫升 椰青水 就含186毫克嘅鉀，鉀質有助保持身體電解質平衡及維持正常血壓。而椰青水嘅脂肪含量好低(每100毫升含少於0.1克)，但仍然含有一定糖份，視乎包裝椰青水有無添加糖份，否則其營養價值與新鮮椰青水相約。」

唔可以完全取代運動飲品

「運動排汗會增加電解質嘅流失，飲椰青水有助補充當中所流失嘅鉀質。而且椰青水含有碳水化合物，可補充體內嘅肌糖同肝糖儲備。但要留意， 椰子水 嘅其他礦物質含量(如鈉、氯)較少，因此唔可以完全取代運動飲品。另外，如運動時間少於一個鐘，一般飲水補充已足夠。」

揀 椰青水 時要留意糖份

「要注意成份表係唔係百分百 椰子水 、有無加添糖份。有啲包裝雖然聲稱「低糖」，但若果飲得多，所攝取嘅總糖份都唔可以睇少。例如: 營養標籤以每100毫升標示，而所含有糖分係5克，飲(500毫升)已攝取咗25克糖(即5茶匙)，差唔多佔一日40%^#攝取量。」

*小貼士：每100毫升含少於5克糖才可稱之為「低糖」

環保達人話：天然的最好

坊間傳聞，話椰青水有天然療效，咁勁？！我哋查詢過流動生命創辦人周兆祥博士，佢有以下睇法：「當然，喺功效上，飲用新鮮椰青水比包裝椰青水較好，但都市人忙碌，飲用包裝椰子水會較方便，總好過飲加工汽水，但要留意飲用嘅椰子水成份係咪純天然，唔建議揀有經化學物質處理過嘅。」

舒緩便秘

「椰青水含有豐富酵素，幫助消化，解除便秘，佢亦係肚瀉之後補充水份同營養嘅合適飲品，亦可利用作為斷食療法。」

有助解宿醉

「椰青水營養非常豐富，但無脂肪、亦無膽固醇，本身又有殺菌功能。佢嘅成份同人體血清幾乎相同，解宿醉效果非常理想。」

包裝 椰青水 大比拼

市面上嘅椰青水五花百門，市面上買到嘅椰青水，到底邊支抵飲啲？邊支好飲啲？依家話俾你聽！

最抵飲

Meko 呢隻純椰青水，味道雖然甜咗啲，味道亦似竹蔗茅根水多啲，但勝在夠平，只係$25.9，同埋熱量係最低，只有79 kJ/100 mL，所以最抵飲！

最低糖

jax coco椰青水標榜無添加糖份或者人工防腐劑，比併產品中，佢嘅糖份最低，只有3g/100 mL ，不過味道都幾酸下。

最似新鮮椰青水

呢隻Koh Coconut曾經榮獲2013 World Juice Award銀獎，價錢係第二便宜，飲落最似新鮮椰青水，並非浪得虛名！

銷售點：

a.惠康超級市場

b.百佳超級市場

c.一田超級市場

d.其星椰子油有限公司

延伸閱讀
【工廈食玩王】 葵興 $198 長腳蟹任食！
小新首間Pop-up 嘜頭黑醬油拉麵
 
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK

新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！