【飲食擂台A&B】 抹茶 流心卷蛋鬥大福
A代表: 宇治石磨濃茶卷蛋
這款 抹茶 卷蛋是日本京都茶游堂的出品，日本總銷量超越十萬個。內裡的軟心以熬煮過的石磨抹茶加入北海道產的鮮忌廉製成，外層捲上純手工製的海綿蛋糕。傳說半解凍狀態下進食會有流心及雪糕的口感。
記者點睇？
「比平時食的 抹茶 卷蛋短一半！一條先分得四小件，唔夠滿足。抹茶甜味很微，很重的甘苦；其實流心係咪即係等忌廉溶到變水呀？（笑）」
同事Ａ：「流心？係咪堅係「流」果隻流心呀？完全感受唔到！質感亦唔夠滑，食到有粉狀物。」
同事Ｂ：「蛋糕軟熟，綠茶味唔出，Like是給海綿蛋糕的，講完。」
流心度：★☆☆☆☆
抹茶味：★★☆☆☆
價錢：★☆☆☆☆ ($145/條 ; 長8cm x 闊8.5cm x 高6 cm )
B代表：日本宇治抹茶流心大福
背負著日本樂天「大福部門」No.1、當地報紙票選 抹茶 甜菓子排行榜第三名等的殿堂稱號，在香港售罄再售罄！面層沾滿石磨宇治 抹茶 粉，中間包著麻糬陷餅及 抹茶 牛奶流心忌廉。
記者點睇？
「一咬即有抹茶忌廉擠入口，唔算好澎湃，但總算做到我要真流心！糯米滋外皮都好煙韌，厚咗少少，忌廉比例多啲會更好。」
同事Ａ：「抹茶味濃好多，甜中帶微甘，忌廉又滑，食晒成粒之後都仲有好強勁既 抹茶 味留喺口。」
同事Ｂ：「口感層次豐富好多，流心絕對強過卷蛋，好食，齒頰留香！」
流心度：★★★☆☆
抹茶味：★★★★☆
價錢：★★★★☆ ($165/ 8粒)
退庭商議之後， 抹茶 流心大福以３：０的票數勝出！流心唔澎湃但最起碼貼題先，而且價錢都抵買，拉勻都係$20粒；反觀卷蛋表現唔理想，除返開都要接近$41蚊一小件，這樣的價位坊間已經可以食到更靚的抹茶卷蛋了。
溫馨提示：睇完想即刻買嚟試？建議你都係打電話問清楚存貨先好衝，因為近日真係嚴重缺貨，老闆已經催緊日本快啲，預告月尾會有大貨殺到，大家要耐心等多陣喇。
Luna Cake
地址: 九龍觀塘成業街7號寧晉中心(東廣場)G21號舖
電話:3575 9696
營業時間: 11am – 8pm
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
