靚場 蒸氣鍋 生劏龍蝦$88/隻【旺角食乜好】

一直心思思想試近期Hit 爆的氣鍋蒸海鮮，但斷両計的海鮮價，令小記卻步已久。最近朋友介紹新開氣鍋專門店，話可以平有平食。甫進店，見裝修格調離地，又吊燈又雲石枱，再睇埋海鮮缸，花竹蝦、大元貝、頂角膏蟹，全部飛機貨，心諗中伏之際，就有伙計介紹新張優惠，重約9両的美國龍蝦只賣$88，膽粗粗要隻蒜蓉開邊蒸。上枱見Size 大過男人手掌，蒸約6分鐘，出爐彈牙爽嫩，龍蝦味濃郁，認真抵食。另外推介蟲草花蒸新鮮雞，蒸出來爆晒黃油的，肉滑味濃。兩個人食，再叫多個籠仔蒸，再吃碗用海鮮倒汗水煮的靚粥，埋單一位二百幾，飽晒！