超簡易DIY！5款自製Hot爆韓食！
No.1火山爆發蛋炒飯
早兩星期有韓國網友瘋傳一座火山炒飯，侍應淋住澎湃蛋漿，個飯就開始噴煙，滑蛋一瀉而下，蛋撈飯咁食，賣相先聲奪人，睇到哇哇聲。即刻翻查一下，原來個飯在濟州好出名！因為濟州由地殼運動而成，更有座知名的漢拿山，當地好多餐廳都有供應呢款「 漢拿山蛋炒飯 」。查實是人人食完辣烤魷魚，都會再加白飯炒埋個汁來吃，侍應會一邊砌個「漢拿山」，一邊淋蛋漿一邊介紹濟州的起源。
五分鐘韓味炒飯
睇片見效果好強勁，自己動手做原來都一樣得。廚具方面，有點深度的鍋甚至鑊都無妨，不過顧及埋影相放上網呃 Like 的話，買塊鐵板仲啱使。做個韓式炒飯都好易，「韓味」不外乎辣椒醬、辣椒粉、泡菜，不消五分鐘炒起個辣味魷魚飯，堆山淋蛋，That’s it！只要砌得個山夠實淨不鬆散。一邊用明火(或Gas爐)烘住，溫度夠高，噴煙無難度。將鮮奶雞蛋炒成滑蛋撈飯吃，好鬼正！
—————————–
Gear邊度買？
32cm圓形鐵板 $110
傳熱度、耐熱頗高，雖偶有黏底情況出現，但用百潔布已能簡易清理。只需一百蚊多啲，抵玩。
東亞冷凍鋼藝集團有限公司
地址：油麻地上海街292-300號地下
電話：2388 2778
—————————–
材料
鮮魷魚 1隻
白飯 3碗
雞蛋 4隻
鮮奶 200ml
芝麻葉 4塊(切碎)
葱 少許(切碎)
紫菜 適量(切碎)
泡菜 適量
Mozzarella芝士 適量
調味
麻油 半湯匙
韓式醬油 2湯匙
蒜蓉 半湯匙
辣椒醬 2.5湯匙
幼辣椒粉 1湯匙
芝麻 少許
鹽 半湯匙
黑椒 半湯匙
做法
1. 魷魚跟所有調味撈勻，備用；炒香泡菜，放入魷魚炒勻，放入白飯再炒。隨後加入芝麻葉、葱、紫菜、芝士炒勻成魷魚飯。將魷魚飯轉至燒紅的鐵板上堆砌成小山，中央壓成小洞，旁邊隨意拮出數個小孔。
2. 發好雞蛋，拌入鮮奶成蛋漿，即可趁鐵板處於高溫時倒入蛋漿。
3. 撒點芝士即成，待半溶狀態即可享用。
下頁續：海鮮九重塔簡易版
No.2海鮮九重塔簡易版
韓國的推銷術認真一流，多人到成隊軍隊的男團女團以多取勝都掂，最近連蒸海鮮也大玩層層疊。首爾奉天便有家海鮮店供應九層海鮮鍋，自從飲食節目出街，加埋網絡的威力，個個都在討論個鍋有幾勁。「九層塔」其實是貝殼蒸。頭八層主要是花蟹、八爪魚、帶子、青口、蠔等貝類海產，底層則是蜆湯。最搞鬼是當中會有粽、紅豆包、糯米釀魷魚等食品，甚有「撐場」Feel。不過捧出來的蒸鍋高高在上，人人立食，的確過癮。
—————————–
Gear邊度買？
33cm複合底三層蒸鍋 $630
除了三層蒸架，還有16cm 深的湯鍋。不銹鋼質料極易打理，附有透明蓋，食物的生熟一目了然。同時可用明火及電磁爐。
富達廚具工程公司
地址：油麻地上海街306號地下
電話：2332 6686
—————————–
不過睇返好多食過的網友反映，餐廳實際只供應三、四 層，壯觀九層塔係為咗拍攝效果㗎咋！在屋企，做個三層矮版都夠晒威水。要似模似樣，闊口蒸鍋必不可少，海鮮方面，旺角、大埔選擇多、紅磡街市老實唔呃秤。買齊花蟹、 帶子、元貝(或扇貝)、鮑魚、青口已經大概成型，買多兩斤蜆用來煲湯，還要學韓國人加個生麵才夠飽肚。問過專家，原來蒸咁多層海鮮都未必需要分先後，因為家用爐火的熱力未必夠一下子升上較頂層的海鮮，所以寧願同時間蒸，最底是蜆湯、上層放冬風螺和雞蛋、再上層是芝士蒸元貝，最頂則是帶子，18至20分鐘便有得食。
延伸閱讀：網上瘋傳！韓國蛋漿飯& 海鮮九層塔大起底！
下頁續：當地至In芝士烤雞
No.3 當地至In芝士烤雞
韓流睇少兩日都驚脫節，前排香港已火速流行當地的芝士烤排骨，話咁快當地又變變變，興起吃芝士烤雞了！餐廳做當然有很多秘方或製法，但簡易的家用版一樣出得廳堂。簡而言之，將雞肉用韓式醬料醃完焗，鐵板的一邊鋪芝士，溶咗就食，聽落簡單，做都係咁簡單！
餐廳會用貴價芝士混平價芝士，自己食當然可以食好啲，例如西式超市便可買到的Mozzarella芝士碎，芝味不會過搶，質感軟糯，又可以 「拉」出效果，啱晒鍾意相機食先的朋友，也可買Mix了車打芝士的 Mozzarella 芝士碎，更多一重鹹香和不同的質感。如三人份量可以預兩至三包芝士，還是怕麻煩，有凍肉店最近新推已醃味的生雞肉、排骨和芝士，一買即烤，超方便。
—————————–
Gear邊度買？
34cm長方鐵板 $150
使用前先塗一層食油，以防芝士黏底，同時要當心兩邊手柄不能隔熱。
新達廚具工程有限公司
地址：油麻地上海街334號地下
電話：2332 9868
—————————–
材料
(2-3人份量)
雞肉 500克
Mozzarella 芝士 200克
調味
韓式醬油 2湯匙
辣椒醬 3湯匙
辣椒粉 2湯匙
糖漿 2湯匙
糖 1湯匙
蒜蓉 1湯匙
麻油 1湯匙
茄汁 2湯匙
做法
1. 雞肉用調味醃20分鐘。放入已預熱的焗爐，以200度焗15分鐘。拿出後鋪在已燒熱鐵板的一邊。
2. 另一邊2/3面積則放入芝士碎。趁芝士處於半溶狀態，即可享用。
下頁續：韓風燒豬宴
No.4 韓風燒豬宴
在香港幫襯韓燒，埋單眨下眼就二、 三百元消費，真令人懷念在當地一百蚊唔使就吃到好滿足的情景。而韓牛矜貴，當地人都唔係成日食，反而好鍾意燒豬的不同部位，最常燒護心肉、豬腩肉，當然少不得啖啖骨膠原的豬皮，而且配埋不同醃法，諗起都口水直流。在韓國街的老字號凍肉店掃一轉即可返歸，醃味切件乜都唔使理便可即燒，爽吧。
這間在金巴利街路口的新國華已經廿幾年歷史，定價老實，區內九成的韓國餐館和韓燒都由他們供應凍肉，而且第二代老闆十幾年前從韓國學廚回流，揀肉、醃肉有心得。例如每隻豬只有 100克的護心肉，只用麻油浸入味，燒出來格外香滑；韓式辣味腩片則以大量蔬果和韓國醬油醃味；還有爽滑的豬皮，要用三、四種香料和醬油處理。試過多款韓式凍肉，豬味濃郁，醃味濃而不鹹，得喎。
—————————–
Gear邊度買？
32cm圓形韓燒鐵板 $188
用明火即可，鐵板傳熱超快，板面有坑紋，方便多餘油分收集到中央油孔，再引流至鍋外。雖偶 有起焦及「鑊屎」，但不會黏得過分，極易清洗。
新達廚具工程有限公司
地址：油麻地上海街334號地下
電話：2332 9868
—————————–
下頁續：百變辛辣麵
No.5百變辛辣麵
我們眼中的韓國人，食個公仔麵都花巧過 人。辛辣麵放芝士敲隻蛋算係最「無嘢」，有時放埋餃子年糕甚至飯糰，最近更有人加薯片，用得著這麼浮誇嗎？實情是他們又大胃又懶，見雪櫃有乜就放乜（之所以有咁多乜鍋物鍋步隊鍋！）， 澱粉質溝澱粉質，肥？咩嚟㗎？想學到十足，不妨參考以下配搭，不過學之餘，更要比他們識食，配咩芝士？邊隻午餐肉好味？即刻解構。
———————————–
黑辛辣麵和紅辛辣麵有咩唔同?
有人話黑版辛辣麵濃啲、辣啲，其實相反！黑版是牛骨雪濃湯味，湯料粉的選材高檔幾級，湯較清、辣味也不高；反之經典的紅版是香菇湯底，辣度又高又搶。第日識揀啦！
———————————–
