西班牙Tapas都有Omakaze@飲食分子

Oct 5 2014

聽聞西班牙餐廳Zafran的Tapas有做Omakaze，同日本菜一樣，廚師只用當日的食材即場發揮，聽落都幾攪鬼，上星期便同咗朋友試！

我們一行四人，被侍應帶到十幾座的Tapas Bar，坐响靠邊位，正好對住總廚Pedro。見到Pedro已覺很面善，啊！佢咪係之前响劉嘉玲間西班牙Fine Dining餐廳Zurriola那位總廚？之前他做的都是精緻系、高水準，而家轉做Tapas，期待會有新嘢。
因為想食海鮮，訂位時已選了$1,000/位的Menu（另有$500/位、$800/位），會有十至十四道Tapas。呢個名為「Theatre of Tapas」的廚師發辦，大部分都是Out of menu的，每日菜式都會唔同。
我們跟Pedro的舞台只有一隻手距離，他由西班牙文化講起，到食材、地理乜都傾，再逐道送上開胃小吃，鯷魚橄欖、陳醋醃西瓜、果仁鵝肝，全部酸微微，一口精緻；又傾下偈，一邊按住我哋進度上咗八道Tapas，蟹肉青瓜卷、紅蝦Carpaccio、帶子牛油果沙律、半熟龍蝦配番茄凍湯，食材超新鮮！賣相完全唔似一粒二粒傳統的西班牙小吃，有啲更靚到似盆景！繼續仲有菇菌甜豆溫泉蛋、慢煮雞肉卷及傳統的西班牙烤乳豬、火腿丸子等幾道菜作結，粗俗啲講，那刻已經飽到反艇！

Pedro即醒水轉用「甜品攻勢」，呢Part超有驚喜！Pedro將薄荷水淋在Mojito雪葩，味道好清好Light，勁好味！之前吃過那十道Tapas後的飽膩感一掃而空；再嚟肉桂焦糖焗麵包，以為再食包會好飽，竟然係輕飄飄的，甜味淡淡，仲有橙味雪糕，讚啊！甜品超出色，令成餐Omakaze好完滿呢！如果有得Request，絕對是Must Have Items！