萬聖節化妝教學 15分鐘輕鬆化出刀疤妝
首先要教大家嘅係刀疤妝，只需要用唇膏、眼線筆、睫毛膠水、血漿同紙巾，15分鐘就可以輕鬆畫出刀疤！
1.以唇膏及眼線筆畫出疤痕
首先用唇膏畫出疤痕，再用眼線筆圍邊，除非大家想個妝好誇張，如果唔係記者建議大家唔好畫得太粗，不過如果疤痕係畫喺身上，就可以畫得粗d喇。
2.用睫毛膠水黏住紙巾
將紙巾撕到最薄，只用一層就可以，然後用睫毛膠水或者雙眼皮膠水黏住紙巾。建議大家先搽一層膠水，黐上紙巾，然後再搽一層膠水，咁就會黐得更實喇！要留意，除非你想順便脫毛，如果唔係黐嘅時候就要避開睫毛及盲毛喇！
3.以血漿及眼線筆上色
上色嘅時候唔洗刻意畫得好整齊，隨意咁畫，效果反而更好。
4.增強真實感
完成疤痕之後，可以喺附近輕抹紅色及黑色顏料，令妝容變得更逼真！
5. 完成
如果想感覺更恐怖，可以戴埋白色或者紅色color con，咁就更有氣氛喇！
化完塊面，跟住落嚟要教大家化個嘴，同樣只需要簡單嘅化妝品，就可以化出驚慄效果！
1.畫出污糟眼及黑色嘴唇
由於今次嘅重點係個嘴，所以眼睛部分可以唔洗咁細緻，輕輕化出污糟效果就得。如果想keep返個靚樣嘅，化普通眼妝一樣得！而嘴唇部分，畫咗出界亦冇所謂，可以營造出恐怖效果。
2.以睫毛膠水黏住紙巾條
同頭先一樣，紙巾係我哋嘅好幫手，用紙巾搓成條狀，再用膠水黐住嘴唇上下兩點。如果唔用紙巾，可以用幼麻繩一樣得。
3.以血漿及眼線筆上色
同頭先一樣，上色嘅時候唔洗太整齊，不過記住要上色上到睇唔到白色為止。
4. 完成
建議大家化呢個妝嘅話，就要食定嘢先喇，如果唔係就要餓住咁玩，而飲嘢嘅話，用飲管幫手就得。而呢個妝最難之處，就係唔可以笑！記者化嘅時候，攝影師哥哥一路喺隔離引我笑，實在忍得好辛苦！
眾所周知，深水埗係掃平貨天堂，而萬聖節，深水埗福榮街亦會變身成道具寶地，應有盡有。
延伸閱讀
海洋公園 哈囉喂 一人靈床尖叫體驗
免費 鬼屋 挑戰心魔 驚過畀鬼嚇【樂富玩乜好】
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK
新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
