【自助餐放蛇起底組】 $300酒店Buffet即開生蠔！中伏無？

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Aug 18 2015

人人都說，今時今日的自助晚餐，無五、六百蚊都落唔到樓。最近銅鑼灣有間酒店，擺低$300就食到Buffet dinner，而且已包加一，有任食即開生蠔、高級意大利餐廳才會供應的大車胎芝士撈意粉，堅唔堅？正唔正？即刻去片。

自助餐前身是酒店中菜廳，數個月前才改裝賣Buffet，新張期間印張優惠券，就可於星期一至四以$298歎自助餐、星期五、六及公眾假期則是八折。以自助晚餐價位而言，確係幾吸睛！

即睇兩大超筍回本位

凍海鮮有咩食，肯定是你食自助餐最關注的項目之一，這裡凍蝦、青口、長腳蟹，有。重點是$300也有生蠔任食！而且是即開的！淨食十幾隻已經回本！雖說每人限取兩隻，不過當晚無乜人，唔駛排隊，可以拎完又拎。師傅開蠔雖然唔太熟手，未夠手起刀落，又要頻頻被蠔殼刺穿膠手套，但都細心掃走蠔殼碎，抵讚。當晚的紐西蘭生蠔質素唔錯，非常新鮮，嫩滑又重海水味，值得瘋狂encore！記者和攝影師總共食咗超過20隻，超級滿足！其他凍海鮮來說，凍蝦爽口彈牙、凍蟹仲有好多膏，齋食海鮮生蠔都已回本。

另一超筍回本位，是現場用24個月巨型巴馬臣芝士即撈意粉。這個一向只限於高級餐廳的供應的玩意，如今已落入大眾化的自助餐free-flow任食！師傅將意粉拌勻醬汁後放上芝士，利用意粉的熱力把巨型溶化芝士，整個過程睇已經興奮，我仲叫師傅撈多啲芝士，而佢又肯喎。醬汁本身已十分Creamy黏咀，加上碌了多到震的芝士，邪惡到極點！

刺身方面，選擇OK，有三文魚、甜蝦、希靈魚等，見師傅從雪櫃取出魚生，以為好新鮮，點知中伏！甜蝦蝦頭發黑，入口即刻化成漿，仲帶少少腥，真係唔敢吞落肚，好彩三文魚無事，仲幾肥美。

同場發現「明將級」壽司，以火腿包住飯和黑魚子，火腿廉價，魚子完全無味，連鹹味都無，伏味很濃。

輪到熱食，也頗為失望，選擇少之餘，感覺更有點求其，例如龍蝦伊麵是殼多過肉，羊架肉質太乾太硬，其他熱食大部份只是微暖，要扣分！

根據網上食評，這裡甜品有Movenpick雪糕供應，當日現場所見，雖有雪糕，但品牌名以膠紙遮蓋，食落的確比平時的味道淡、質感也很薄，說不上好食。剩餘的甜品也是平平無奇的大路款式，味道唔突出，尚算合格。