神山裸跑任奔走 狂野登山勿獻醜@杜遊珍
廣告
繼尼泊爾之後，另一登山熱點沙巴神山上星期發生5.9級地震，截稿前傷亡數字未明，話說每年4至10月都係攀沙巴神山季節，呢個時間發生天災實屬不幸，希望登山嚮導同山友都吉人天相！
捉鬼獵巫 裸拍惹眾怒
今次神山山頂震到耳仔都跌爛埋，有網民立即歸咎早前在山頂裸體拍照的一棚外國人。其實早在地震之前，當地已經不停聲討譴責此行為，認為不成體統、有觸怒山神之嫌，甚至呼籲緝拿負責帶隊的響導！地震之後，借勢怪罪呼聲就更高！據傳警方已經鎖定目標人物，阿珍只能祝佢哋好運……
靈氣滿山 山友不談「征服」
雖然阿珍份人好Open，但對於裸體戶外活動，單係聽到都覺得好刮肉……唔係阿珍迷信，就連真正熱愛行山朋友L，都表示「山山係唔可以得罪.」，資深登山毅行者都會對高山峻嶺有一份敬重、唔可以拗氣：「你話係心理作用或者迷信都好，好多時你愈埋怨天氣唔好，個天氣就會更加變壞！」 阿珍記得同成功攀越世界七大高峰鍾Sir 傾過偈，亦強調真正登山客都會抱有謙卑心態，佢話過外國山友同亞洲山友最大分別：「其實我好少用『征服』這個字眼，雖然總會有滿足感，但每次攀得過一座山，都提醒自己要感恩，而且落山路途漫漫，輕佻自滿、實在百害無一利啊！」
