燃油減費一啖砂糖 港人硬食「機場建造稅」 @杜遊珍

上星期公布咗2月份嘅燃油附加費，竟然大幅度下調37%，短線甚至跌破$100，聽到阿珍心郁郁！燃油附加費每個月調整一次，睇返過去一年，真係同油價一樣有跌無升。呢個消息對一眾密鑼緊鼓出埠嘅朋友本應係天大喜訊，但網民反而怨聲載道，嫌燃油附加費嘅跌幅跟唔上急轉直下嘅油價。一班網民果然夠心水清，依家每桶油價已經跌到得番50美元，相當於09年5月嘅水平，翻查番紀錄，原來嗰陣嘅燃油附加費僅僅為$239（ 長線）同$52（ 短線）。相比之下，2月嘅最新報價竟然係當時嘅兩倍，可算係拜航空公司長期「加快減慢」所賜!以為有得減點都算係好消息，點知阿珍又空歡喜一場。轉過頭機管局竟然建議向離境旅客徵收HK$150至$200嘅「機場建造稅」去興建第三跑道，計埋現時$120嘅離境稅，即係日後要畀成$300出境，咁搞法，啲納雜稅項咪分分鐘貴過我張廉航機票？第三跑道醞釀咗咁耐，大嗱嗱斥資成千四億公帑惹起外界詐晒型嗌反對，當局一於決定先斬後奏，直接向外遊客開刀集資，唔使政府撥款，連通過立法會都慳番，我哋啲升斗市民又邊有得say no 吖？