大手抽稅32.5% 澳洲 Working Holiday末日＠杜遊珍
廣告
阿珍個姪仔早輪去完 澳洲 打工度假，一年流浪返嚟，成個人 charm 咗又靚仔晒，阿珍都 好安慰。本來諗住叫佢推介吓袋鼠國有咩筍工，點知問開竟然有驚人發現！原來 澳洲 政府早前通過咗預算案，下個財政年度（2016年7月）開始，所有喺當地嘅backpackers將一律被列為「非居民身分」，無端端喪失免稅額，無論搵幾多錢，一律要被抽高達32.5% 的超重皮入息稅！
「本來背包客同澳洲人一樣，每年有$18,200免稅額㗎嘛！就算賺多咗都係交19%；新稅制加到咁重，賺埋都未必夠交租！」 姪仔擰晒頭咁呻，原來以澳洲工廠最低工資時薪 AUD21為例，而家交完稅都有AUD19落袋，下年開始就得返 AUD14，慘過打黑工！再加上簽證費用年年加、澳紙插水、下年仲要開放5,000強國人去打工度假……咪講話掘金還鄉，就連儲錢去玩都唔係容易，難怪消息一傳出，背包客whatsapp群一遍鬼哭神號……阿珍奉勸一句，有心想去Working Holiday就趁今年起行，咪再等喇！
