東京百年車站酒店華麗住宿體驗@Wina

Jan 31 2015

去東京酒店選擇唔多，要位處旺區、近車站又平的，來來去去都係新宿幾間港人熱門 budget hotel，房細到連喼都開唔到的已經係不變的定律。上年年頭去東京時就跳出呢個框框，特別入住 2012 年改裝後重新開幕，位於丸之內百年歷史的東京車站內的 Tokyo Station Hotel，實在是個令人念念不忘的住宿體驗。酒店就位於 JR 站內，門前就有地鐵站，交通自然方便到不得了。搭的士前往羽田機場每程只需港幣二百多元左右，價錢算合理，而且無需繞過車站去搭機場巴士，方便得多！

由於是車站改建，酒店只有 4 層，但樓底超高，一入大堂已可感受到氣派不凡，古典歐風的裝修，大堂仲有個仿古火爐，服務員好笑容而且不用排隊極速完成 check-in。酒店成長型房間排列在一旁，一入房服務員會介紹酒店地圖，因為酒店內長廊多到處都差不多模樣，很容易迷路。客房的佈置亦超華麗，我們住的雙人房面積較 budget hotel 當然大，而且樓底高感覺就更闊落！但由於要隔火車站的聲浪，所以酒店房的所有窗戶都不能打開，我個人就沒大所謂。反而就一提酒店的自助早餐，在頂樓的餐廳可以用「別有洞天」形容，三角形的屋頂設有天窗將陽光採入室內，貫徹的高樓底真係好有氣勢，食物都用心製作，放了兩個價值近萬元的電飯煲，可以任裝粥、飯，餸菜份量選擇多、份量夠，而且酒店以外國客為主，氣氛極寧靜，可以安安落落歎個早餐。雖然酒店價錢較一般 V 字頭 budget 酒店稍貴，但可以享受 5 星級服務同環境來講，每房每晚二千元左右的價格，其實好超值。

東京ステーションホテル（The Tokyo Station Hotel）
地址：東京都千代田区丸の内1-9-1
電話：03-5220-1111
網址：http://www.tokyostationhotel.jp/