新加坡人氣豆花 布丁 新店登陸旺角
棄用石膏粉 海藻膠原助凝固
去新加坡一啲出名小店買豆花 布丁 ，繁忙時間都可能要排長龍！店主見豆花 布丁 咁受歡迎，就將佢哋由新加坡引入香港，呢間舖頭係加盟店，總店始於新加坡，製作上就照足當地配方，材料用有機黃豆，棄用石膏粉。吓？唔加石膏粉，咁用乜野令個 布丁 凝固架？問負責人，原來其中一個秘方係以海藻提煉嘅膠原輔助凝固，話食落有助皮膚靚啲喎！(係真唔係架？！)
店內依家有五款口味嘅豆花 布丁 ，包括原味、杏仁、黑芝麻、朱古力麥精、同奶茶味，依家就逐隻味話你知！
原味布丁 充滿豆香
第一個試嘅係原味 布丁 ，食之前就加咗班蘭糖漿。 布丁 真係超級滑！一下子就滑咗入口中。食到有微微嘅班蘭香味，但唔人工，幾自然，而 布丁 有好香豆味，似係「食」緊一杯香濃嘅豆漿。
童年回憶 朱古力麥精味
細個去茶餐廳，見爸爸叫鴛鴦飲，又想飲下，但佢話：「細路仔唔好飲咁多咖啡奶茶」，就叫咗杯兒童鴛鴦俾我啦(Menu上面無，但伙記又知係乜)，其實係阿華田加好立克，飲落都幾甜下。仲以為呢杯兒童鴛鴦味 布丁 都係咁甜，但又唔係喎，食落有好濃嘅朱古力香味同埋麥香味，唔太甜。
台式口味 茶香突出
呢杯奶茶味 布丁 ，視覺上顏色似兒童鴛鴦味，兩者都係啡啡地色，杯上無貼紙標籤，我問負責人點分到，佢話：「我哋做開好易就分到架啦！」，細睇之下，奶茶味嘅啡色係淡色少少嘅！個 布丁 有陣紅茶味，但無茶嘅苦澀味，夾埋本身 布丁 原有嘅豆味，都幾香！
黑芝麻布丁 OL之選
芝麻糊豆腐花呢個經典組合，依家都融入咗豆花 布丁 之內，個名仲叫「黑絲誘滑」？唔好諗咗其他野，呢個名無非想話呢個黑芝麻 布丁 有絲滑口感啫。負責人話試業期間，呢種口味多OL揀，話黑芝麻養顏喎，係咪真係work？
傳統口味 杏味香濃
除咗黑芝麻味之外，亦有其他傳統口味嘅 布丁 ，好似呢個杏仁味咁，食落有濃濃杏仁香，配埋滑嘟嘟口感，就好似食緊杏仁豆腐咁。
店舖7月1 號已經開始試業，試業期間，每杯豆花 布丁 都係$22，價錢抵唔手抵…見仁見智啦！未知之後會唔會加價。而7月19號將會正式開張，負責人預告開張後將會有新產品推出，到底係乜？大家要密切留意我哋新假期嘅報道！
Modos
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
