搞錯！ 機艙 愈縮愈細 乘客怪招爆笑自救＠杜遊珍
廣告
航空公司度縮搶錢成性，一向遭人鬧爆，overbook 之餘，你唔畀錢UPGRADE 咩，咁加位令 經濟機位收窄 囉。此舉更令近日的美國乘客權益組織聯署叫政府立例監管， 機艙 座椅縮極都要有個譜，否則增加乘客衝突外，有咩事要逃生都難！我阿珍都覺得好合理，搭長途機屈手屈腳都算，仲要黐住隔籬坐，絕對易起摩擦，窄到連走難都行唔郁，太不該！但爭取尚未成功前，市面早有售賣一系列抗衡窄爆機位的爆笑隨身產品，保證勁過叮噹發明！
法寶1
前座膝蓋空間捍衛器 Knee Defender
機位已經好窄， 若前座傾斜椅背，幾乎無得郁。此塑膠夾神奇在安裝於飛機枱骹位後，可卡住前座椅背，防止後傾。兩位前後座乘客便曾因此暗器開拖，令客機中途降落！無他， 自私到咁， 嬲豬就梗，難怪連聯合航空都禁埋！
法寶2
重奪私隱彈性布簾B-Tourist
座位迫得太緊，做任何事隔籬左右通通睇透，呢張彈性布簾就可以令你重奪私人空間，附上鬆緊圈可調校成枕頭，再懶瞓都不怕，更設小袋收埋隨身物。不過如果坐走廊位用，塊布箍實晒阻人出入，都好乞人憎啫！
法寶3
超級椅背袋 Seatback Travel Organizer
如圖所示，如果你坐長途機係誇張到想搬埋冷氣洗衣機出門先安心嗰隻，呢款椅背袋你絕對適用，不過看來，隨身品如此齊全，個長途機似乎要搭到下世先落都無問題……
法寶4
潔癖者飛機椅套 Plane Sheet
萬人坐過嘅飛機座椅，通常都唔乾淨得去邊，呢款飛機椅套一定係潔癖者恩物， 機位再窄都似返個家，仲有迷彩、豹紋等不同花款揀，但要在眾人入座一刻，秒速將座椅由頭笠到尾， 似乎唔太可能……
