堅離地的 Marry Chrismax@杜遊珍

今期阿珍想寫田大少北俊去奧地利滑雪渡「Marry Chrismax 」。咪住咪住，大家唔好以為李八方上咗我身，其實每逢聖誕新年暑假檔，睇下啲高官議員去咗邊度旅行，其實好有參考性㗎，就例如開創佔領先河嘅蔣明燈麗芸，兩次去大馬都有客機事故就知啦。Anyway，自詡一生不羈放縱愛自由（ 黨）嘅田少，今年無職一身輕，終於可以兌現被劈爆政協時的承諾，同家人三代同堂放假去旅行，仲喺fb放下一句串咀到爆的「Marry Chrismax 」就飛去滑雪，盡顯大少風範！經阿珍我翻查剪報，田家近年聖誕都去滑雪過節，前兩年都係去日本北海道，舊年飛歐洲，今年就揀咗奧地利最出名Innsbruck 附近的滑雪區Lech，同處於阿爾卑斯山區的Lech，無法國瑞士咁大路咁多遊客之餘，都有好多靚木屋酒店。雖然田少呻今年雪量唔夠，山頂仲見到草，之但係睇佢upload 上fb嘅滑雪英姿，喺條初中級滑道ski 落山都幾有型，相比起田二少只係去東京跑步同食八爪魚，大少去歐洲滑雪先夠離地感，仲回覆網民話條片係女婿拍嘅，幾咁一家親，威過留港同齊昕食甜筒嘅梁特，喺沙圈踱步，果然係要打下親民牌！