《 國家地理 》攝影大賽 優秀作品率先睇！
廣告
不少人去旅行都會「相機食先」，上載打卡呃like是必須的吧！如果期間影到一張自己覺得都「哇」一聲的靚爆心水作品，不如試下參加比賽啦！話說2015 國家地理 雜誌攝影大賽正在進行得如火如荼，全球專業及業餘人士都開始遞交作品，除了高水準靚相，亦有用DC傻瓜機影的作品，不過創意搭救同樣精彩！比賽分為人物、地方 及大自然三個主題，11月16日截止投稿，明年1月中公布結果！心郁郁想參加但未有拍攝靈感？立即率先睇《 國家地理 》編輯每周的心水推介，趁機偷師學藝吧！
企鵝奇兵 (Steffen Flugel)
南喬治亞島一直是國王企鵝的樂土，每到繁殖季節場面尤其壯觀！面對成千上萬的小企鵝，當下人類立即成為「少數」，拍攝到咁震撼的場面，難怪會成為《 國家地理 》的心水推介！
瞓咗咁耐，我要爆啦！(Francisco Negroni)
位於智利的卡爾布科火山，在沉睡40多年後，今年4月再次甦醒大爆發，期間仲行雷閃電，逼使成村人逃難！攝影師膽粗粗留低繼續影，所以話，有時想影靚相真係要搵命搏！
跳入「火」海(John Moran)
咪懷疑！這張相完全無PS過！潛水員Lesley Gamble跳進北佛羅里達州的「Devil’s Ear Spring」，捲起水底下不同的礦物，才會有這個跳入「火海」的神奇效果，勁特別！
外星圖騰(Tugo Cheng)
哇！唔通又有人影到外星人留低的神秘圖騰？錯了！原來只係哈爾濱人在極寒冬天徒步走過已結冰的松花江時留下的痕跡。咦？點解佢哋要兜住圈咁行？
自然警號(Eric Lew)
多得全球人類落力破壞環境，冰山崩塌已經不是什麼新鮮事，攝影師只是希望用震撼場面讓大家提早醒覺，保護及愛惜地球。
寧靜一刻(Takashi Nakagawa)
摩洛哥是世界人口密度最高的國家，街上環境非常嘈吵，尤其在主要城市馬拉喀什！不過還是會有靜下來的一刻，Takashi在靜候多時後就終於在一所學校中拍下了這個寧靜時光。
2015 National Geographic Photo Contest
網址 : photography.nationalgeographic.com/contest-2015
