【 自助餐 放蛇起底組】十多款 Mövenpick 任食 $160酒店Lunch buffet

六款凍海鮮任食

入場前都有擔心過，埋單唔使$200的 自助餐 ，會否無啖好食，誰知由凍海鮮開始就已經有驚喜。雖然沒有生蠔，但款式也不少，有凍蝦、翡翠螺、蜆肉、青口，連凍瀨尿蝦都有，最多人搶的就是凍蟹，原隻斬 開兩件很巨型，每次Refill完都極速沽清。味道方面也值得一讚，凍蟹佈滿甘香的軟滑蟹膏，全無半點腥味，唯獨中間直接斬開會令蟹殼碎趺入蟹內，食時不太方便；蜆肉、青口等貝殼類也完全唔韌，青口更帶微微的牛油香氣，好食！凍蝦肉質不算彈牙，但超級鮮甜。難怪每個食客都拿到盤滿砵滿。

再來瘋狂食谷巴火腿、厚切刺身

食完凍海鮮，再發現即刨的谷巴火腿配蜜瓜，同場亦有莎樂美腸等的凍盤，誠意真係滿分。谷巴火腿口感比較濕潤，食落油潤鹹鮮十足，更能引出蜜瓜的甜味。

頭盤仲未完！即切的日本刺身也不容錯過，有齊三文魚、吞拿魚、鯛魚及蟹柳，件件厚切又肥美；唔夠喉更有細細碗的魚生飯，以這個$160的 自助餐 而言，真係齋食頭盤都已經回晒本了。唯一缺點是刺身豉油淡而無味，需要改善。

享受完豐富的頭盤，立即轉移陣地去熱食區。居然有四個Live Station咁多，分分鐘比平時坊間一般的 自助餐 還要多！當中包括即煮的粉麵檔，有清湯或喇沙湯底，麵底及配料的選擇也很豐富；另外還有即蒸點心，款式每輪不同，皮薄餡靚的蝦餃熱辣辣，食完一粒又一粒，仲有燒賣、咖喱魷魚、鳳爪和包點等，全部都很高水準；必食推介有即炸天婦羅，看著師傅不停將新鮮的蔬菜、蝦等材料蘸上薄薄的粉漿再炸，外脆內軟，完全不油膩。最後仲有燒烤Live station，有燒秋刀魚、燒雞翼等的燒物，燒牛仔骨充滿油脂香，肉質腍滑，很惹味，試食專員encore咗四件，絕對係必食！

Live station夠多之餘，其他熱食也是喜出望外。 自助餐 的熱食大多質素低落，甚至平平無奇，味道一般。但這裡的熱食卻值得一讚，除了保溫做得好，令食物長期保持新鮮溫熱之外，款式也很多元化，味道也很美味，中式小炒做得最好，風味十足。其餘的西式料理也是花心機之作，例如墨汁飯釀魷魚筒等。不論味道和質素都比一般 自助餐 優質。

輪到甜品時間，這個超筍價自助餐仍然唔放過你。每枱附送一張雪糕卡，憑卡無限次任取。走到雪糕車前一看，竟然是Mövenpick 雪糕！而且有12款口味 任選，除了大路的款式如士多啤梨、原味乳酪外，還有特色味道如提子冧酒、楓糖合桃雪糕、法式焦糖燉蛋雪糕等。面對十多款口味的雪糕，記者已經覺得好難揀！ 就連Topping也有十款，朱古力彩針、香蕉乾、熊仔糖，甚至連雞蛋仔和窩夫都有，可以逐件插在雪糕上，實在是太邪惡了！

食完雪糕，還有十多款的糕品甜品等著你。Cheesecake、慕絲、蛋糕、果撻、果凍…….女生們定必失守。味道也不錯，士多啤梨慕絲酸酸甜甜，絕非士多啤梨香精味道；合核撻很香脆，而且齒頰留香。而且甜品size很的骰，等你可以試晒咁多款都唔覺得飽滯。最後還有朱古力噴泉也是不容錯過。

飲品也有驚喜發現，一般自助餐都是咖啡、奶茶等款式可以任飲。這裡竟然有冰凍的藍梅沙冰！冰感度很足夠，沙冰更是幼滑，紫色的沙冰裡是甜甜的藍梅味，完全不是藥水味。記者於是又飲了三杯先罷休，整餐飽到捧住個肚走。

總分：9 / 10

這個六折 自助餐 絕對能以無敵來形容，確實要給予一個極高的分數。作為一個自助午餐，由頭盤的凍海鮮、熱食到甜品都充滿驚喜，款式多，就連味道也屬高質，很抵讚。而且 自助餐 能夠做到中伏指數接近零，絕不容易，更不要說由頭到尾都令人滿意。再加上這個價錢非常吸引，真的做到平、靚、正！不過要溫馨提示你，優惠期去到九月尾咋，睇啱就快啲上網登記Book位喇！

柏景餐廳 Café on the PARK

地址: 尖沙咀廣東道33號中港城皇家太平洋酒店園景翼2樓（顯示地圖）

查詢: 2738 2322

收費: (星期一至五、公眾假期前夕) 成人$268；小童$208

(星期五至日、公眾假期)成人$348；小童$258

備註：六折優惠須於dining.royalpacific.com.hk/tc/iprestigerewards登記並支付全費

延伸閱讀：
【Food Battle】 和牛火鍋 放題激鬥
【自助餐放蛇起底組】$148 放題 新場 試食安格斯肩胛肥牛
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK

新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
想最快接收第一手的旅遊飲食資訊？Easy！
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」，搞掂！