伊波拉大爆發 東非動物星球慘被牽連@杜遊珍

無辜當災　最怕會停航
西非就話請都唔去啫，東非每年的動物大遷徙，就吸引唔少香港人去朝聖，不過世界衛生組織早幾日已將肯亞列入第二級高風險國家，無計，雖然肯亞至今仲未發現有伊波拉病例，但由於本身係前往西非的交通樞紐，每星期有超過70班客機由西非4大疫國飛抵，難免有潛在危機。阿珍醒起專做特色旅行團的行家L今個星期會飛去肯亞，忍不住打去八卦下：「我自己就唔驚，我阿媽就每日打畀我報告疫情，其實東非同西非差好遠，而且Safari 啲地方動物仲多過人，人口唔密集， 入肯亞亦要攞Medicalcert，我覺得安全過去尖沙咀囉！」行家L最擔心反而係回程航班取消，事關世衛評級一出，泡菜航空已即時取消往來首爾和奈羅比的航班，萬一其他航空公司效法，又或者轉機時唔畀入境，行家L分分鐘要滯留當地，到時認真濕滯！

聽天由命　等酌情退款
至於報咗名嚟緊去肯亞的人，就要視乎個別旅行社做法，有旅行社以出發在即為由，團友要求退團甚至改期都不獲退款，也有旅行社准許客人取消行程，但會將一半團費扣起，改為參加旅行社其他團種，即使客人選擇如期出發，都唔會安排隨團領隊，只獲當地單位接待。不過唔係間間旅行社都咁有人情味，阿珍只希望旅遊業議會快啲出手做嘢，等航空公司同旅行社酌情畀團友免費改期，唔使去玩都要搵命搏咁慘情。