今秋必試5大金牌蟹舖@Dining娜

雖然天氣愈嚟愈凍，但身為一個「吃貨」，喺呢個秋冬之際，對食嘢嘅欲望，同氣溫相反，係會愈嚟愈熾熱嘅！秋風起，唔使我提，各位為食人士都知道又到蟹季啦。聽過人地話「世界上第一個食蟹嘅人係相當勇敢嘅」，諗落又真係，而身為蟹迷，更加要多謝佢嘅勇敢，造福後人啊。

大閘蟹可以話係蟹中極品，食咗咁多年，唔敢話自己係專家，但總有少少心得嘅。廣告話打邊爐最緊要係個爐，唔通食蟹最緊要係碟醋？咪玩啦，要食到靚蟹，關鍵當然係去邊度入貨。買靚蟹唔使過海嘅，九龍區已經有好多優質選擇，等我介紹番啦。

肥仔號大閘蟹專門店

呢間肥仔號主要賣太湖同陽澄湖大閘蟹，最有型係佢標榜「唔靚包換」呢個保證，你就知佢對自己賣嘅蟹幾有信心啦。聽老闆講，佢每年都會親自去當地揀靚蟹，品質上乘，價錢公道，所以街坊熟客都好支持。

員工同老闆都係專家，佢哋教路尾部睇落淡黃色，表示蟹膏新鮮；蟹肚有少少鼓起，就係飽滿嘅象徵，記住喇！ — 老闆同員工都係專家，佢哋教路尾部睇落淡黃色，表示蟹膏新鮮；蟹肚有少少鼓起，就係飽滿嘅象徵，記住喇！

地址：九龍城侯王道73號地舖（顯示地圖）
電話：2718 7207
網站：www.fatho.com.hk

華興行

Organic嘅菜同生果聽得多，你有無諗過原來大閘蟹都可以有機！華興行喺江蘇太湖有自己嘅養殖場，對水質、養殖員經驗同養殖方式呢幾方面，都有嚴格規定，確保無污染，而且堅持用魚仔、水藻呢類天然飼料嚟餵蟹，唔用人工飼料，所以真係有機嘅大閘蟹。至於食落味道有乜唔同？你自己試下啦。

地址：佐敦吳松街148號I-J地舖（顯示地圖）
電話：2838 1688
網站：www.wahhinghong-crab.com

旭海

呢間老字號除咗陽澄湖蟹出名，近年嚟講，太湖嘅同樣係主打。以前就話陽澄湖先正宗，但其實今時今日技術進步，兩個地方嘅出品已經一樣咁高質。而旭海有個優勢係成本相對低，因為舖頭係老闆自己物業，唔使交租，自然可以喺價錢上調整下，回饋一班熟客仔啦。

反正介紹蟹舖，我都唔怕長氣咁講，記得剔走個六角形嘅蟹心，相傳佢係「最寒涼之物」，唔食好過食。

地址：深水埗海壇街227A地下（顯示地圖）
電話：2360 0663 / 2360 0762

永富大閘蟹專門店

平時呢，永富睇落係生果舖，但一到蟹季，就會多咗幾個專櫃，賣頂級陽澄湖大閘蟹！呢度老闆同大陸蟹商一齊搞蟹場，千挑萬選至誕生1款鎮店之寶：輝皇蟹。聽個名都feel到佢會爆膏，因為係每100隻之中揀30隻出嚟，再重點培育嘅，難怪好多城中名人好似蔡瀾、發哥、劉青雲都係佢Fans啦。

如果要形容，每間蟹舖都係名校，而輝煌蟹係名校生入面考頭3名嘅，膏嘅量同鮮味係幾突出。 — 如果要形容，每間蟹舖都係名校，而輝皇蟹係名校生入面考頭3名嘅，膏嘅量同鮮味係幾突出。

地址：九龍城侯王道47號舖（顯示地圖）
電話：2718 2688 / 2718 2689
網址：www.wingfu.hk

上海新三陽南貨

終於輪到壓軸嘅呢間老字號喇，就係喺九龍城接近60年嘅新三陽，佢絕對可以話係全港知名嘅大閘蟹專家。為咗確保品質，佢哋直頭喺江蘇太湖自己開咗養殖場，用螺螄、田螺呢類天然飼料餵蟹，聽講會令蟹膏同蟹肉嘅蛋白質量更加高，味道會比較鮮甜。佢最特別係舖頭賣好多配蟹一流嘅酒，又有好多傳統乾濕貨，好似金華火腿、雪菜咁，就算唔係蟹季，我都不時去幫襯㗎。